தேர்தல் விதி மீறல், நடிகை குஷ்புக்கு சம்மன்!

தேர்தல் நேரத்தில் வாக்காளர்களுக்கு பணம் கொடுத்ததாக 60 வழக்குகள், வாக்காளர்களை இடையூறு செய்ததாக 19 வழக்குகள், தேர்தல் விதிகளை மீறியதாக 260 வழக்குகளை, தேனி மாவட்ட போலீசார் பதிவு செய்தனர்.

இதில், 10 வழக்குகளில் தண்டனை பெற்றுத்தரப்பட்டுள்ளது. 210 வழக்குகளில் குற்றப்பத்திரிகை தாக்கல் செய்யப்பட்டுள்ளது. 40 வழக்குகள் விசாரணை நிலையில் உள்ளன. தேர்தல் வழக்குகள் அனைத்தும் போலீஸ் ஸ்டேஷன் ஜாமீனில் வெளிவரக் கூடியவை என்பதால், வழக்கு பதிவு செய்யப்பட்ட அனைத்து வேட்பாளர்களையும் கைது செய்து, ஜாமீனில் விட்டுள்ளனர்.

ஆனால், பிரசாரத்திற்கு வந்த நடிகை குஷ்பு மீது பழனிசெட்டிப்பட்டி, ஆண்டிப்பட்டி போலீசில் விதிகளை மீறியதாகவும், பொதுமக்களுக்கு இடையூறு செய்ததாகவும் வழக்கு பதிவு செய்யப்பட்டுள்ளது. குஷ்பு வெளியூரைச் சேர்ந்தவர் என்பதால், சம்மன் அனுப்பி கைது செய்ய வேண்டிய சூழ்நிலை உள்ளது. இவருக்கு ஸ்டேஷனில் ஆஜராகுமாறு சம்மன் அனுப்பி உள்ளதாக போலீசார் தெரிவித்தனர்.

Posted in: தமிழகம்